ಕಡಿರುದ್ಯಾವರ : ಬಾಲಕಿಯ ಮೇಲೆ ಲೈಂಗಿಕ ದೌರ್ಜನ್ಯ ಪ್ರಕರಣ: ಇಬ್ಬರು ಆರೋಪಿಗಳ ಬಂಧನ
ಕಡಿರುದ್ಯಾವರ: ಕಡಿರುದ್ಯಾವರ ಗ್ರಾಮದಲ್ಲಿ ಬಾಲಕಿಯ ಮೇಲೆ ನಡೆದ ಅತ್ಯಾಚಾರ ಪ್ರಕರಣಕ್ಕೆ ಸಂಬಂಧಿಸಿದಂತೆ ಇಬ್ಬರು ಆರೋಪಿಗಳಾದ ಮನೋಹರ್(23), ಮಾಧವ( 30) ಇವರನ್ನು ಬಂಧಿಸಲಾಗಿದೆ.
ಬೆಳ್ತಂಗಡಿ ತಾಲೂಕಿನ ಕಡಿರುದ್ಯಾವರ ಗ್ರಾಮದ ಕೊಪ್ಪದ ಗುಂಡಿ ಮನೆ ಎಂಬಲ್ಲಿ ಬಾಲಕಿಯೋರ್ವಳು ಹತ್ತಿರದ ಮನೆಯಾದ ಸುಧೀರ್ ಎಂಬಾತನ ಮನೆಗೆ ಶಾಲಾ ರಜಾ ದಿನಗಳಲ್ಲಿ ಟಿವಿ ನೋಡಲೆಂದು ಹೋಗಿದ್ದ ವೇಳೆ ಡಿ.26 ರಂದು ಆರೋಪಿ ತನ್ನ ಅಜ್ಜಿಮನೆಗೆ ಬಾಲಕಿಯನ್ನು ಕರೆದುಕೊಂಡು ಹೋಗಿ ಪದೇ ಪದೇ ಲೈಂಗಿಕ ದೌರ್ಜನ್ಯ ವೆಸಗಿ ಗರ್ಭಾವತಿ ಮಾಡಿದ್ದು ಮನೆಯಲ್ಲಿ ವಿಷಯ ತಿಳಿಸಿದರೆ ನಿನ್ನ ಮೇಲೆ ಪೊಲೀಸ್ ಕಂಪ್ಲೆಂಟ್ ಕೊಡುವುದಾಗಿ ಆಕೆಯನ್ನು ಹೆದರಿಸಿದ್ದ.
ಅಲ್ಲದೆ ಗರ್ಭಾವತಿ ಎಂದು ತಿಳಿದ ಮೇಲೂ ಪುನಃ ಲೈಂಗಿಕ ದೌರ್ಜನ್ಯವೆಸಗಿದ್ದು ಬೇರೆ ಊರಿಗೆ ಆರೋಪಿಗಳು ಸೇರಿ ಮಾರುತಿ ಓಮಿನಿ ಕಾರಿನಲ್ಲಿ ಕರೆದುಕೊಂಡು ಹೋಗಿ ಯಾವುದೋ ಆಸ್ಪತ್ರೆಯಲ್ಲಿ ಗರ್ಭಪಾತ ನಡೆಸಲಾಗಿದೆ ಎನ್ನಲಾಗಿದೆ.
ನೊಂದ ಬಾಲಕಿಗೆ ಲೈಂಗಿಕ ದೌರ್ಜನ್ಯ ಆದ ಬಗ್ಗೆ 1098 ಚೈಲ್ಡ್ ಲೈನ್ ನಿಂದ ಡಿ.30 ರಂದು ಬೆಳ್ತಂಗಡಿ ಪೊಲೀಸ್ ಠಾಣೆಗೆ ಮಾಹಿತಿ ಬಂದು ಇದನ್ನು ಖಚಿತ ಪಡಿಸಲು ಸಿಡಿಪಿಒ ಕಚೇರಿಯ ಅಧಿಕಾರಿಯವರೊಂದಿಗೆ ಠಾಣಾ ಮಹಿಳಾ ಸಿಬ್ಬಂದಿಯವರು ತೆರಳಿ ಮಾಹಿತಿ ಪಡೆಯಲು ಪ್ರಯತ್ನಿಸಿದಾಗ ಮಾಹಿತಿಯನ್ನು ನೀಡದೇ ಇದ್ದುದರಿಂದ ಮಕ್ಕಳ ಕಲ್ಯಾಣ ಸಮಿತಿಯ ಆದೇಶದ ಮೇರೆಗೆ ಮಕ್ಕಳ ಕುಟೀರದಲ್ಲಿ ಆಪ್ತ ಸಮಾಲೋಚಕಿಯವರ ಆಪ್ತ ಸಮಾಲೋಚನೆಯ ಬಳಿಕ ನೀಡಿದ ಮಾಹಿತಿಯಂತೆ ಜ.7 ರಂದು ಆರೋಪಿಗಳನ್ನು ಬಂಧಿಸಲಾಗಿದೆ
